ڈی جی آئی ایس پی آر میجر جنرل بابر افتخار نے دنیا نیوز پر کامران شاہد کے ساتھ گفتگو کرتے ہوئے عمران خان اور شیخ رشید کے بیرونی سازش کے متعلق بیانات کی سختی سے تردید کردی۔ ڈی جی آئی ایس پی آر نے کہا کہ شیخ رشید صاحب نے بیان دیا اور کہا کہ میٹنگ میں کسی بھی چیف نے یہ نہیں کہا کہ کوئی سازش نہیں تھی، ڈی جی آئی ایس پی آر نے کہا کہ یہ بالکل غلط بات ہے، اس میٹنگ میں تینوں سروسز چیف اور ڈی جی آئی ایس آئی موجود تھے اور ان سب نے بہت واضح طور پر اور بہت مفصل انداز میں شرکاء کو بتایا کہ کسی قسم کی سازش کے کوئی شواہد نہیں ملے ۔ ایسا کچھ نہیں ہوا۔ ڈی جی آئی ایس پی آر نے مزید کہا کہ ہماری ایجنسیز دن رات یہی کام کرتی ہیں، پاکستان کے خلاف ہونے والی سازش کو ناکام بنانا ان کا کام ہے ۔

اس پر کامران شاہد نے ڈی جی آئی ایس پی آر سے سوال پوچھا کہ کیا میٹنگ میں مداخلت کا ذکر ہوا تھا آپ مداخلت اور سازش کو کس طرح ڈسکرائب کرتے ہیں، کیونکہ یہ بھی بہت کہا گیا کہ مداخلت بھی بہت بڑی چیز ہوتی ہے۔ کامران شاہد کےسوال پر ڈی جی آئی ایس پی آر نے کہا کہ یہ ڈپلومیٹک لفظ ہے اور اس کی بہتر وضاحت کوئی ڈپلومیٹ ہی کرسکتا ہے، ڈی جی آئی ایس پی آر نے مزید کہا کہ ہماری طرف سے یہی بتایا گیا کہ کسی قسم کی سازش کا کوئی ثبوت نہیں۔