اداروں کیخلاف اکسانے کا کیس: لیفٹیننٹ جنرل (ر) امجد شعیب 3 روزہ جسمانی ریمانڈ پر پولیس کے حوالے

اسلام آباد : مقامی عدالت نے اداروں کیخلاف اکسانے کے کیس میں لیفٹیننٹ جنرل ریٹائرڈ امجد شعیب کو تین روزہ جسمانی ریمانڈ پر پولیس کے حوالے کردیا۔

تفصیلات کے مطابق اسلام آباد پولیس کی جانب سے اداروں کو بغاوت پر اکسانے سے متعلق کیس میں گرفتار لیفٹیننٹ جنرل ریٹائرڈ امجد شعیب کو جوڈیشل مجسٹریٹ عباس شاہ کی عدالت میں پیش کیا گیا۔

تفتیشی افسر اور پروسیکیوٹر عدنان کی جانب سے امجد شعیب کے سات روزہ جسمانی ریمانڈ کی استدعا کی گئی۔

امجد شعیب کے وکیل مدثر خالد نے عباسی نے جسمانی ریمانڈ کی مخالفت کرتے ہوئے امجد شعیب کو مقدمے سے ڈسچارج کرنے کی استدعا کی۔

عدالت نے دونوں جانب سے دلائل مکمل ہونے ہر فیصلہ محفوظ کرلیا جو بعد میں سناتے ہوئے لیفٹیننٹ جنرل ریٹائرڈ امجد شعیب کو تین روزہ جسمانی ریمانڈ پر پولیس کے حوالے کردیا۔

بعد ازاں اسلام آباد کے جوڈیشل مجسٹریٹ عباس شاہ نے لیفٹیننٹ جنرل(ر)امجد شعیب پر اداروں کیخلاف اکسانے کے کیس کا تفصیلی فیصلہ جاری کردیا۔

جس میں کہا گیا کہ ناقابل ضمانت دفعات کے کیس میں پولیس نے ملزم کے پہلے ریمانڈ کی استدعا کی، پولیس کاموقف ہے لاہور سے فوٹوگرامیٹری ٹیسٹ اسلام آباد سے وائس میچنگ ٹیسٹ کرانا ہے۔

عدالت کا کہنا تھا کہ امجدشعیب کا 2 مارچ تک 3 روزہ جسمانی ریمانڈ منظور کیا جاتا ہے، ان کا 3 روزہ جسمانی ریمانڈ شروع ہونے سے پہلے اور بعد میں طبی معائنہ کروایا جائے۔