جناح ہاؤس حملہ کیس میں ٹک ٹاکر منیب علی گرفتار۔۔

نو مئی کیس: ٹک ٹاکر منیب علی گرفتار، شناخت پریڈ کیلئے جیل منتقل

انسداد دہشت گردی عدالت کی جج عبہر گل نے پولیس کی درخواست پر لاہور میں 9 مئی کو جناح ہاؤس جلاؤ گھیراؤ اور توڑ پھوڑ کے مقدمے کی سماعت کی۔

پولیس نے واقعے میں ملوث ہونے کے الزام میں ٹک ٹاکر منیب علی کو گرفتار کرکے انسداد دہشت گردی عدالت میں پیش کیا، اے ٹی سی نے ملزم کو 5 اگست کو دوبارہ پیش کرنے کی ہدایت کردی۔

پولیس ٹک ٹاکر ملک منیب علی چہرہ ڈھانپ کر عدالت لائی، اے ٹی سی نے ملزم کو شناخت پریڈ کیلئے جیل بھیج دیا۔

سابق وزیراعظم اور چیئرمین پی ٹی آئی عمران خان کو اسلام آباد ہائیکورٹ سے نیب نے رینجرز کی بھاری نفری کی مدد سے 9 مئی کو گرفتار کیا تھا، جس کے بعد لاہور سمیت ملک کے مختلف شہروں میں پرتشدد مظاہرے ہوئے۔

لاہور میں جناح ہاؤس (کور کمانڈر ہاؤس) پر بھی پی ٹی آئی کے کارکن جمع ہوئے، مشتعل کارکنان نے جناح ہاؤس پر حملہ کیا، توڑ پھوڑ اور جلاؤ گھیراؤ کیا۔