ایف آئی اے کا مریم نواز کی تصاویر کو مصنوعی ذہانت کی مدد سے ایڈٹ کر کے وائرل کرنے والوں کے خلاف کارروائی کا آغاز

پاکستان کے صوبہ پنجاب کی وزیر اعلیٰ مریم نواز کی تصاویر کو مصنوعی ذہانت کی مدد سے ایڈٹ کر کے سوشل میڈیا پر وائرل کرنے والوں کے خلاف کارروائی کا آغاز کر دیا گیا ہے۔

پاکستان کی وفاقی تحقیقات ایجنسی (ایف آئی اے) کے مطابق اس مہم کا حصہ بننے والے سوشل میڈیا اکاؤنٹس کی فہرست تیار کر لی گئی ہے۔

ایف آئی اے کی جانب سے جاری بیان کے مطابق ان اکاؤنٹس کی مدد سے مصنوعی ذہانت سے تیارہ کردہ تصاویر کے ذریعے مریم نواز اور متحدہ عرب امارات کے صدر کو بدنام کرنے کی کوشش کی گئی۔

واضح رہے کہ چند روز قبل وزیر اعلیٰ مریم نواز پر اس وقت تنقید ہوئی جب انھوں نے ایک سرکاری دورے کے دوران متحدہ عرب امارات کے صدر محمد بن زاید سے ہاتھ ملایا۔

مریم نواز کے معاون خصوصی نے اُن کی یو اے ای کے صدر کے ساتھ تصویر اپنے ایکس اکاؤنٹ پر شیئر کی تھی جس میں پاکستان کے وزیر اعظم شہباز شریف کو بھی دیکھا جا سکتا ہے۔

اس کے بعد سوشل میڈیا پر ایک ایسی مہم شروع کی گئی جس میں مذکورہ تصویر کو کچھ صارفین نے قابل اعتراض ایڈیٹنگ کر کے وائرل کیا تھا۔

ایف آئی اے کے مطابق اس کیس کی تفتیش کے لیے ٹیمیں تشکیل دے دی گئی ہیں جو نشاندہی کریں گی کہ یہ مواد کہاں سے شروع ہوا۔