کراچی کے علاقے صدر کی پریڈی سٹریٹ پر احمدیوں کی ایک عبادت گاہ کے باہر احتجاج کے دوران مظاہرین کے تشدد سے ایک احمدی شہری ہلاک ہو گیا ہے۔

کراچی کے تھانہ پریڈی کے ایس ڈی پی او محمد صفدر کے مطابق عبادت گاہ کے باہر ہونے والے احتجاج کے دوران احمدی شہری مظاہرین کے تشدد سے ہلاک ہوا ہے۔

ان کا کہنا تھا کہ عبادت گاہ کے باہر کس نے ہنگامہ آرائی کی اور مقتول پر کس نے تشدد کیا اس حوالے سے ایف آئی آر درج کرنے کے بعد تحقیقات کی جائیں گی۔

دوسری جانب پریڈی سٹریٹ تھانے میں تعینات ایک پولیس اہلکار نے بی بی سی کو بتایا کہ ہلاک ہونے والا شخص عبادت گاہ کے باہر موجود احتجاجی مظاہرین کی ویڈیو بنا رہا تھا اور اسی دوران اس پر تشدد کیا گیا۔

پولیس اہلکار کا مزید کہنا تھا کہ عبادت گاہ کے باہر جمع ہونے والے افراد کی تعداد تقریبا 200 تھی اور وہ شدید نعرے بازی کر رہے تھے۔

دوسری جانب اس سے قبل جمعے کی دوپہر احمدیہ کمیونٹی کی جانب سے جاری بیان میں بتایا گیا کہ ’احمدیہ ہال واقع موبائل مارکیٹ صدر کراچی کے باہرایک ہجوم جمع ہے جس نے احمدیہ عبادت گاہ کا گھیراو کیا ہوا ہے۔

بیان کے مطابق اندر تقریبا 40 کے قریب احمدی موجود ہیں جو جمعے کی عبادت کے لیے جمع ہوئے تھے۔

بیان میں بتایا گیا تھا کہ ’یہ اطلاعات بھی ہیں کہ ہجوم کی جانب سے ایک احمدی کو شدید تشدد کا نشانہ بنایا گیا۔ بعد ازاں ان کی موت واقع ہو گئی۔‘