شوگر کے مریضوں کیلئے خوشخبری۔ ذیابیطس کے علاج میں سائنس کی بڑی کامیابی۔ذیابیطس کے مریض نے جین ایڈیٹڈ سیل ٹرانسپلانٹ کے بعد خود انسولین پیدا کی

ٹائپ 1 ذیابیطس کے شکار ایک شخص نے جینیاتی طور پر تیار کردہ خلیوں (سیلز) کی پیوندکاری کے بعد پہلی بار خود انسولین پیدا کی ہے، اور اسے ریجیکشن سے بچانے کے لیے کوئی دوائی لینے کی ضرورت بھی نہیں پڑی۔

یہ کیس، جو اس ماہ نیواِنگلینڈ جرنل آف میڈیسن میں شائع ہوا ہے، ذیابیطس کے علاج میں ایک ممکنہ سنگ میل قرار دیا جا رہا ہے۔ یہ بیماری دنیا بھر میں 95 لاکھ افراد کو متاثر کرتی ہے۔

ٹائپ 1 ذیابیطس اُس وقت پیدا ہوتی ہے جب مریض کا مدافعتی نظام (امیون سسٹم) لبلبے میں موجود خصوصی خلیوں کو تباہ کر دیتا ہے، جنہیں "آئلیٹ سیلز" کہا جاتا ہے۔ یہی خلیے انسولین پیدا کرنے کے ذمہ دار ہوتے ہیں، جو خون میں شوگر کی مقدار کو قابو میں رکھتی ہے۔ یہ بیماری انسولین کے باقاعدہ انجیکشنز سے قابو میں رہ سکتی ہے لیکن اس کا فی الحال کوئی مستقل علاج موجود نہیں۔

آئلیٹ سیل ٹرانسپلانٹ ذیابیطس کے مریضوں کے لیے طویل مدتی انسولین فراہمی کا ذریعہ بن سکتا ہے۔ تاہم مسئلہ یہ ہے کہ پیوندکاری کے بعد مریض کا مدافعتی نظام ان نئے خلیوں کو اجنبی سمجھ کر حملہ کر دیتا ہے، جس سے یہ خلیے تباہ ہو جاتے ہیں۔ اس وجہ سے مریض کو ساری زندگی امیونوسپریسیو ادویات لینی پڑتی ہیں، جو انفیکشنز کا خطرہ بڑھا دیتی ہیں۔

ان مسائل پر قابو پانے کے لیے سویڈن اور امریکا کے سائنس دانوں نے ڈونر کے لبلبے سے لیے گئے آئلیٹ خلیوں کو CRISPR جین ایڈیٹنگ ٹیکنالوجی کے ذریعے اس طرح بدلا کہ مریض کا مدافعتی نظام انہیں مسترد نہ کرے۔ یہ پہلی بار ہے کہ یہ طریقہ انسان پر آزمایا گیا ہے۔

جینیاتی طور پر تبدیل شدہ خلیے لگانے کے 12 ہفتے بعد بھی مریض کے جسم میں انسولین بن رہی ہے اور اس پر مدافعتی نظام کا کوئی ردعمل نہیں ہوا۔

محققین نے اپنے مقالے میں لکھا کہ اگرچہ یہ ابتدائی مطالعہ ہے، لیکن نتائج بتاتے ہیں کہ جینیاتی انجینئرنگ کے ذریعے پیوند شدہ خلیوں کو مدافعتی نظام سے بچانا ایک قیمتی طریقہ ہو سکتا ہے، جو مستقبل میں اعضاء یا خلیوں کے ریجیکشن کو روکنے میں مدد دے گا۔

اس نئے طریقۂ علاج میں، سائنس دانوں نے ڈونر کے خلیوں میں CRISPR کے ذریعے تین جینیاتی تبدیلیاں کیں۔ دو تبدیلیوں کا مقصد ایسے پروٹینز کی مقدار کم کرنا تھا جو ہماری سفید خون کے خلیوں کو یہ سگنل دیتے ہیں کہ کوئی خلیہ اجنبی ہے یا نہیں۔ تیسری تبدیلی میں ایک پروٹین CD47 کی پیداوار بڑھائی گئی جو دیگر مدافعتی خلیوں کو حملہ کرنے سے روکتا ہے۔

ان جینیاتی طور پر بدلے گئے خلیوں کو مریض کے بازو میں لگایا گیا۔ مریض کے جسم نے ان خلیوں کو نقصان نہیں پہنچایا اور وہ انسولین پیدا کرنے لگے۔

اگرچہ مریض کو صرف کم مقدار میں خلیے دیے گئے تھے اور اسے فی الحال انسولین کے انجیکشنز کی ضرورت ہے، لیکن یہ کامیاب تجربہ اس بات کی نشاندہی کرتا ہے کہ یہ عمل محفوظ ہے۔

اب سائنس دان اگلے مرحلے میں مزید مطالعات کریں گے تاکہ دیکھا جا سکے کہ یہ خلیے طویل عرصے تک زندہ رہتے ہیں یا نہیں۔ اگر ایسا ہوا تو اس سے ذیابیطس کے علاج میں آسانی ہو گی اور ممکنہ طور پر اس بیماری کا مستقل علاج بھی سامنے آ سکتا ہے۔